Як паведамілі у прэс-службе УУС Гомельскага аблвыканкама, пры пагрузцы вагона з металаломам на адкрытай пляцоўцы часовага захоўвання ў капровым цэху БМЗ былі знойдзеныя дзевяць падствольных гранат маркі "ВОГ-25" — асколачны боепрыпас для гранатамётаў. У воінскай часці 5527 Бабруйска ўсе боепрыпасы былі знішчаныя. 
Як стала вядома, разам з металаломам для перапрацоўкі на БМЗ часта трапляюць розныя боепрыпасы. Патроны, міны, гранаты прывозяць, у асноўным, сярод металічнага лому з Расіі. Работнікі завода своечасова выяўляюць небяспечныя прадметы і выклікаюць для іх абясшкоджвання спецыялістаў. Выпадкаў выбуху боепрыпасаў на БМЗ не фіксавалася.

БелаПАН

У Мазыры гарэў рынак

У ноч на 1 лютага ў Мазыры на рынку "Славянскі" адбыўся буйны пажар.
А дванаццатай гадзіне ночы ў дзяжурную часць паступіў званок аб моцным задымленні ў адным з гандлёвых павільёнаў, паведаміў БелаПАН прэс-сакратар Гомельскага абласнога ўпраўлення МНС Руслан Габрылёў.
Рынак 2004 года пабудовы належыць таварыству з абмежаванай адказнасцю. Прадпрымальнікі і прыватныя гандлёвыя прадпрыемствы арандуюць тут месцы і рэалізуюць прамысловыя і харчовыя тавары.
У выніку пажару была знішчана маёмасць у 13 павільёнах на агульнай плошчы 320 квадратных метраў. Яшчэ восем павільёнаў пашкоджаныя.
"Практычна ўсе пажарныя прадпісанні на рынку былі выкананыя, спрацавалі апавяшчальнікі. Але да пажару, прывёў, хутчэй за ўсё, чалавечы фактар. Як мяркуецца, нехта пакінуў уключаным на ноч электраабагравальнік, з-за кароткага замыкання ўзнік пажар", — дадаў Габрылёў.