Паводле дадзенага праекта рэспублі­канскага бюджэту на 2012 год, адобранага двума палатамі парламента, больш за ўсё Мінску прыйдзецца выплаціць Міжнароднаму валютнаму фонду – амаль 563 млн. долараў (асноўны доўг складзе $ 429,1 млн. плюс $ 133,9 млн. прыйдзецца накіраваць на яго абслугоўванне), піша TUT.by.

На другім месцы па ступені пазыковай нагрузкі значацца аблігацыі, выпушчаныя на знешніх фінансавых рынках. У наступным годзе Беларусь павінна будзе выплаціць $ 440, 8 млн., з іх $ 181,6 млн. – гэта адсоткі.

Пазыкі Кітая складаюць $ 228,7 млн. На пагашэнне асноўнага доўгу прыпадае $ 126,7 млн.

Па крэдытах Расіі і падкантрольнага ёй Антыкрызіснага фонду ЕўрАзЭС Беларусь пакуль расплачваецца толькі па працэнтах – 136, 7 млн. і 106,6 млн. долараў адпаведна.

На пагашэнне часткі крэдыту Венесуэлы ў 2012 годзе Беларусi прыйдзецца выдаткаваць 122,2 млн. долараў (92,4 млн.плюс 298 млн.).

Астатнія пазыкі – Сусветнаму банку ($ 13,1 млн.), ЗША ($ 5 млн.) і Германіі ($ 526 тыс.) – выглядаюць не такімі вялікімі.

Варта адзначыць, што асобным артыкулам значацца плацяжы ўрада Беларусі ў якасці гаранта па пагашэнні і абслугоўванні знешніх пазык – гэта 14,8 млн. долараў.

Дзеля справядлівасці варта сказаць, што пазыковая нагрузка на бюджэт у 2012 годзе рэзка ўзрасце, але яшчэ не дасягне свайго піку. Практычна двухразовае павелічэнне абавязацельстваў паўторыцца і ў 2013 годзе, калі плацяжы складуць больш як $ 3 млрд. У 2014 годзе сітуацыя лепшай не стане. Па дадзеных, на цяперашні час Беларусь павінна $ 3,2 млрд.

Варта сказаць, што нядаўна міністр фінансаў Андрэй Харкавец адзначыў, што ў Беларусі не адбылося пагаршэння якасці пазыковага партфеля (сярэдні тэрмін дапагашэння крэдытаў складае каля 6 гадоў, кошт абслугоўвання – 4% гадавых), але пры гэтым звярнуў увагу на наяўную тэндэнцыю павелічэння знешняга дзярждоўгу Беларусі, патлумачыўшы гэта неабходнасцю прыняцця мер па стабілізацыі валютнага рынку і ростам інвестыцыйнага крэдытавання.

Знешні дзярждоўг Беларусі да канца будучага года прагназуецца ў аб'ёме $ 14,3 млрд., гэта значыць, на $ 1,8 млрд. больш цяперашняга. Павелічэнне можа адбыцца за кошт асваення пазык, атрыманых з Сусветнага банка і Кітая на рэалізацыю інфраструктурных праектаў (арыентыровачны аб'ём каля $ 1 млрд.). Беларусь таксама можа атрымаць два траншы крэдыту Антыкрызіснага фонду ЕўрАзЭС – яшчэ $ 880 млн. Акрамя таго, у Беларусі пачнецца будаўніцтва АЭС за кошт дзяржкрэдыту ўрада Расiі (а гэта каля $ 800 млн. у год). Аднак нельга выключаць, што і гэта не мяжа. У мінулую пятніцу Аляксандр Лукашэнка сказаў, што Беларусь будзе не супраць атрымаць крэдыт ад МВФ у аб'ёме ад 2,5 да 5 млрд. долараў. Дарэчы сказаць, шматлікія эксперты лічаць, што новая праграма з МВФ паслужыць для інвестараў як зялёнае святло святлафора для прыходу ў Беларусь. З іншага боку, у Мінску відавочна спадзяюцца, што рэсурсы МВФ павінны дапамагчы ў рэструктурызацыі наяўных даўгоў. Але з такой пастаноўкай пытання наўрад ці згодныя ўжо ў самым Фондзе...

Разам з тым міжнародныя эксперты ўпэўненыя у плацежаздольнасці Беларусі ў кароткатэрміновы перыяд, але іх насцярожваюць тэмпы росту пазыковай нагрузкі, якая цяпер складае каля 30% ВУП (у пачатку года каля 17,8%). Па міжнародных стандартах лічыцца, што пара біць у набат пры набліжэнні гэтага паказчыка да 40­50%. Таму што ў іншым выпадку Беларусь можа сутыкнуцца з праблемамі краін еўразоны.